ភ្នំពេញ: លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានណែនាំ និងផ្ដល់គន្លឹះមួយចំនួន ជូនដល់មន្ត្រីមន្ទីរពាណិជ្ជកម្ម និងមន្ត្រីសាខាការពារ អ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តបន្ទាយមានជ័យ ឱ្យបន្តអនុវត្តន៍ ឱ្យបានខ្ជាប់ខ្ជួន ដើម្បីឱ្យការងារមាន ប្រសិទ្ធភាពខ្ពស់ និងលទ្ធផល កាន់តែល្អប្រសើ។នៅក្នុងពិធីសំណេះសំណាល ជាមួយមន្ត្រីរាជការ នៃមន្ទីរពាណិជ្ជកម្ម ខេត្តបន្ទាយមានជ័យ នៅរសៀល ថ្ងៃទី២៥ ខែមករា ឆ្នាំ២០២១ នេះ លោករដ្ឋមន្ត្រី ប៉ាន សូរស័ក្តិ បានលើកឡើង នូវគន្លឹះសំខាន់ៗ ជូនដល់មន្ត្រីរាជការថាៈ ត្រូវបន្តខិតខំយកចិត្តទុកដាក់ ក្នុងការពង្រីកចំណេះដឹង បន្ថែមទៀត ទាំងកម្រិតជំនាញ និងភាសាបរទេស តាមរយៈការសិក្សាបន្ថែម ការស្រាវជ្រាវ និងដកស្រង់នូវ បទពិសោធន៍ ពីមន្ត្រីដែលមានសមត្ថភាព និងជាពិសេសរួមសហការគ្នា ចុះត្រួតពិនិត្យសុវត្ថិភាព ផលិតផលទំនិញ គ្រឿងឧបភោគ បរិភោគ ឱ្យកាន់តែស្វាហាប់ ដើម្បីការពារសុខភាព របស់ប្រជាពលរដ្ឋ, បញ្ចៀសដាច់ខាត ការទាមទារកម្រៃសេវាក្រៅផ្លូវការ ពីអាជីករ ពាណិជ្ជករ ផលិតករ អ្នកនាំចេញ និងសេវាផ្សេងៗ ដែលផ្ទុយពីខ្លឹមសារ ប្រកាសរួមស្តីពី កម្រងសេវាសាធារណ: រវាងក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុ, ស្នើបន្តជំរុញពង្រឹងបន្ថែម យន្តការតាមដាន និងត្រួតពិនិត្យ ការគ្រប់គ្រងអាជីវកម្ម សេវាកម្ម ពាណិជ្ជកម្ម ថ្លៃទំនិញ និងសន្និធិទំនិញចាំបាច់ ស្រូវ-អង្ករ ប្រេងឥន្ធនៈ និងការធ្វើពាណិជ្ជកម្មទំនិញ នៅតាមព្រំដែន ដោយប្រើប្រាស់ ប្រព័ន្ធបច្ចេកវិទ្យាព័ត៌មាន។ ជំរុញយន្តការដោះស្រាយ រាល់បញ្ហាដល់កសិករ ផលិតករ ដោយផ្តោតលើផលិតផល សក្តានុពល ចំនួន ៥មុខ មាន់ស្រែ បន្លែ ដំឡូង ស្រូវប្រណិត និងសូត្រ ដោយបង្កើតផ្សារចុងសប្តាហ៍។ថ្មីៗនេះ ក្រសួងបានបង្កើតក្រុមប្រឹក្សាពិន័យ សំដៅទប់ស្កាត់ និងពង្រឹងការអនុវត្តច្បាប់ ស្តីពីលក្ខន្តិកៈមន្ត្រីរាជការស៊ីវិល បង្កានូវបាតុភាពអសកម្ម មិនគោរពវិន័យ ពុករលួយ រំលោភច្បាប់ និងបទបញ្ជាផ្ទៃក្នុង។ ពេលចុះអនុវត្តន៍ការងារ និងនៅក្នុងជីវភាពប្រចាំថ្ងៃ ក្នុងស្ថានភាពថ្មី នៃជំងឺកូវីដ១៩ នាពេលនេះ ត្រូវមានស្មារតីប្រុងប្រយ័ត្ន ជាប់ជានិច្ច និងត្រូវអនុវត្តឱ្យបានត្រឹមត្រូវ តាមការណែនាំរបស់ ក្រសួងសុខាភិបាល។ជាមួយគ្នានេះ លោករដ្ឋមន្ត្រី បានសម្ដែងនូវការកោតសរសើរ ចំពោះសមិទ្ធផល និងស្នាដៃជាច្រើន ដែលមន្ទីរពាណិជ្ជកម្ម និងសាខា ក.ប.ប ខេត្តបន្ទាយមានជ័យ សម្រេចបានកន្លងមក គួរជាទីមោទនៈ ដែលឆ្លុះបញ្ចាំងឱ្យឃើញ ពីការបំពេញភារកិច្ច ប្រកបដោយស្មារតីទទួលខុសត្រូវ ជាពិសេសកិច្ចសហការល្អ ជាមួយរដ្ឋបាលខេត្ត និងអង្គភាពមន្ទីរពាក់ព័ន្ធ ក្នុងខេត្តបន្ទាយមានជ័យ៕
ព័ត៌មានគួរចាប់អារម្មណ៍
បុរស២នាក់ត្រូវជាបងប្អូនថ្លៃនឹងគ្នា បានជួបជុំគ្នាផឹកស៊ីរហូតដល់ស្រវឹងធ្លាក់ភ្នែករៀងខ្លួន ក៏កើតមានជំលោះ ឈានដល់ អំពើហិង្សា ដោយភាគីប្អូនថ្លៃ បានទាញកាំបិតផ្គាក់ កាប់ទៅលើបង ()
វីដែអូ