ឃុំទ្រា គឺជាឃុំមួយដែលមានសន្ទុះយ៉ាងខ្លាំងក្នុងការអភិវឌ្ឍទៅលើប្រព័ន្ធធារាសាស្ត្រមានប្រឡាយទឹក និងអាងទំនប់ទឹក សំរាប់បម្រើអោយវិស័យកសិកម្មនៅក្នុងមូលដ្ឋានក្នុងនោះក៏មានការចូលរួមចំណែកពីស្ថាប័នក្រសួងនានាជួយកសាងផងដែរ
ខេត្តតាកែវ ៖ បើតាមលោក ស៊ឹម សុខុន មេឃុំទ្រាក្នុងស្រុកសំរោងខេត្តតាកែវបានអោយដឹងថា ក្នុងឃុំមានប្រព័ន្ធប្រឡាយទឹក មានអាងទំនប់ទឹកត្នោតទេ សំរាប់បំរើអោយវិស័យកសិកម្មនៅក្នុងមូលដ្ឋាន,ក្នុងនោះប្រព័ន្ធប្រឡាយទឹកដែលបានស្តាររួចរាល់ហើយក្នុងឆ្នាំ២០២២-២០២៣ បាន១ខ្សែប្រវែងបណ្តោយ១០គីឡូម៉ែត្រ ទទឹង១២ម៉ែត្រជាគំរោងស្តាររបស់ក្រសួងធនធានទឹក និងឧតុនិយម ប្រជាជនអាចធ្វើស្រែបាន១ឆ្នាំ៣ដង ក្នុងភូមិទាំង១១ ក្នុងសង្កាត់។
លោកមេឃុំបានបន្តអោយដឹងទៀតដែរថា ចំណែកក្រសួងកសិកម្មរុក្ខាប្រមាញ់ និងនេសាទ វិញក៏មានគំរោងជួយស្តារប្រឡាយទឹក១ខ្សែផងដែរ ដែលមានប្រវែងបណ្តោយ១០គីឡូម៉ែត្រ ទទឹង១២ម៉ែត្រ ជម្រៅពី៣-៤ម៉ែត្រ គ្រោងស្តារនៅឆ្នាំ២០២៥ ខាងមុខនេះ។
ចំណែកកងវិស្វកម្មរបស់រាជដ្ឋាភិបាលវិញ ក៏បានជួយធ្វើផ្លូវកៅស៊ូ១ខ្សែ ៥គីឡូម៉ែត្រ និងបានជួយសាងសង់ស្ពានចំនួន២កន្លែង ស្ពានទី១ ប្រវែង១២០ម៉ែត្រ ទទឹង១០ម៉ែត្រ ស្ពានទី២ប្រវែង៣០ម៉ែត្រ ទទឹង១០ម៉ែត្រ គំរោងសាងសង់នេះកាលពីឆ្នាំ២០២៣ បានរួចរាល់ជាស្ថាពរ។
យើងក៏បានពិនិត្យឃើញផងដែរពីការយកចិត្តទុកដាក់របស់លោកមេឃុំបានប្រើប្រាស់ថវិកាមូលនិធិឃុំធ្វើផ្លូវបេតុងបាន១ខ្សែប្រវែង៤៥០ម៉ែត្រ ទទឹង៦ម៉ែត្រ ធ្វើផ្លូវក្រាលគ្រួសធម្មជាតិបាន១ខ្សែ ប្រវែង១៣០០ម៉ែត្រ ទទឹង៥ម៉ែត្រ គំរោងធ្វើនេះកាលពីឆ្នាំ២០២៣។ សំរាប់ឆ្នាំ២០២៤ ឃុំមានគម្រោងធ្វើផ្លូវបេតុង១ខ្សែប្រវែង ៧០០ម៉ែត្រ ទទឹង៦ម៉ែត្រ ដែលនឹងចាប់ដេញថ្លៃនៅខែកក្កដា ឆ្នាំ២០២៤ ខាងមុខនេះ។
ពាក់ព័ន្ធទៅនឹងការងារមនុស្សធម៌វិញចាប់ពីឆ្នាំ២០២២ រហូតដល់បច្ចុប្បន្ននេះឃុំបានជួយឧបត្ថម្ភដល់គ្រួសារក្រីក្រ និងគ្រួសារងាយរងហានិភ័យបានចំនួន៤៦១គ្រួសារ ជាថវិការបស់រាជរដ្ឋាភិបាល។ ឃុំក៏បានយកចិត្តទុកដាក់ផងដែរ ក្នុងការសម្របសម្រួលដោះស្រាយនូវរាល់ទំនាស់ផ្សេងៗ មានដូចជាអំពើហិង្សាក្នុងគ្រួសារនិងវិវាទដីធ្លីជាដើម បានជាច្រើនករណី។ មានករណីខ្លះឃុំមិនអាចសម្របសម្រួលបាន ឃុំបានបញ្ជូនទៅថ្នាក់ខាងលើជួយដោះស្រាយបន្ត ។
